Dinamalar · 4 Sept, 4:47

Religion

மதுரையில் விநாயகர் சதுர்த்தி வழிபாட்டிற்கு கட்டுப்பாடு; செப்.,15க்குள் நீர்நிலைகளில் கரைக்க அறிவுறுத்தல்

மதுரை: 'விநாயகர் சதுர்த்தியையொட்டி பொது இடங்களில் சிலைகளை வைத்து வழிபாடு நடத்த போலீஸ், வருவாய்த்துறை அதிகாரிகளின் அனுமதி அவசியம்' என, கலெக்டர் நிஷாந்த் கிருஷ்ணா தெரிவித்துள்ளார். மதுரை மாவட்ட நிர்வாகம் சார்பில் விநாயகர் சதுர்த்தி விழா பாதுகாப்பு ஏற்பாடுகள் குறித்த ஆலோசனை கூட்டம் கலெக்டர் தலைமையில் நடந்தது. எஸ்.பி., தேவநாதன் முன்னிலை வகித்தார்.

டி.ஆர்.ஓ., அன்பழகன், உதவி கலெக்டர் உட்கர்ஷ்குமார், பயிற்சி கலெக்டர் சித்தார்த் போகர்னா, மாநகராட்சி துணை கமிஷனர் ஜெய்னுலாபுதீன், போலீஸ் துணை கமிஷனர்கள் கார்த்திக், இனிகோ திவ்யன், வனிதா, பிரபாகரன் உட்பட பலர் பங்கேற்றனர்.

கலெக்டர் பேசியதாவது: செப். 14ல் விநாயகர் சதுர்த்தி. செப்.,13ல் விநாயகர் சிலைகளை வழிபாட்டுக்காக நிறுவி, செப்.,15க்குள் விசர்ஜனம் (கரைத்தல்) செய்ய வேண்டும். பொது இடங்களில் வழிபட நகரில் போலீஸ் உதவி கமிஷனர், பிறபகுதிகளில் ஆர்.டி.ஓ.,விடம் அனுமதி பெற வேண்டும். இடஉரிமையாளர் ஒப்புதலுடன் உள்ளாட்சி, நெடுஞ்சாலை, மின்வாரியம், தீயணைப்புத் துறையிடம் தடையில்லா சான்று பெற வேண்டும்.

வழிபாட்டு கூடாரங்கள் தகரத்தால் அமைக்க வேண்டும். சிலைகள் நிறுவும் இடங்களில் 2 பேர் பாதுகாப்பு பணியில் ஈடுபட வேண்டும்.

10 அடிக்கு மிகாமல், பிளாஸ்டர் ஆப் பாரிஸ், தெர்மகோல், ரசாயன வண்ணப்பூச்சுகளாலான சிலைகளை தவிர்த்து, களிமண், காகிதக்கூழ், இயற்கை சாயங்களால் செய்தவற்றை பயன்படுத்த வேண்டும். கூம்பு வடிவ ஒலிபெருக்கி, பிளக்ஸ்போர்டு, வெடி வெடிப்பது, பிறர் புண்பட கோஷம் எழுப்பக்கூடாது.

மருத்துவமனை, கல்விநிறுவனம், வழிபாட்டு தலம் அருகே சிலைகள் அமைக்கக் கூடாது. ஊர்வலமாக எடுத்துச் செல்கையில், போலீஸ் அனுமதித்த வழிகளில் மட்டுமே கொண்டு செல்ல வேண்டும். மாட்டு வண்டி, மீன்பாடி வண்டி, டிரை சைக்கிள்களில் எடுத்துச் செல்லக்கூடாது.

மதுரை நகரில் வைகை வடகரை கீழத்தோப்பு, திருமலைராயர் படித்துறை, ஒத்தக்கடை குளம், செவந்திக்குளம் கண்மாய், புறநகர் பகுதியில் அனுமதிக்கப்பட்ட நீர்நிலைகளில் மட்டுமே சிலைகளை கரைக்க வேண்டும்.

முன்னதாக சிலைகள் மீதான பூமாலை, துணிகள், அலங்கார பொருட்களை அகற்ற வேண்டும். இவ்வாறு அவர் பேசினார்.