News18 Tamil ·
Religion
மரகத நிற மேனி... ‘பச்சைப் புடவைக்காரி’ - கும்பாபிஷேகத்தால் மீண்டும் சிறப்புப் பெறும் மீனாட்சி அம்மன் கோவில்
மதுரை மீனாட்சி அம்மன் கோவிலில் சுமார் 17 ஆண்டுகளுக்குப் பிறகு செப்டம்பர் 17 அன்று மகா கும்பாபிஷேகம் நடைபெற உள்ளது. இந்த கும்பாபிஷேகம் மதுரையின் ஆன்மிக வரலாற்றில் ஒரு முக்கிய நிகழ்வாக கருதப்படுகிறது.
மதுரை மீனாட்சி அம்மன் கோவிலில் சுமார் 17 ஆண்டுகளுக்குப் பிறகு செப்டம்பர் 17 அன்று மகா கும்பாபிஷேகம் நடைபெற உள்ளது. கடம்ப மரங்கள் நிறைந்த பகுதியாக இருந்ததால் பழங்காலத்தில் மதுரை, கடம்பவனம் என அழைக்கப்பட்டதாக புராணங்கள் கூறுகின்றன. இந்த கும்பாபிஷேகம் மதுரையின் ஆன்மிக வரலாற்றில் ஒரு முக்கிய நிகழ்வாக கருதப்படுகிறது.
ஆன்மிக ஆர்வலர் செண்பகவல்லி கூற்றுப்படி, மதுரையின் பெயர் 'மதுரம்' என்ற சொல்லுடன் தொடர்புடையது. பாற்கடலைக் கடைந்தபோது வெளிப்பட்ட விஷத்தை சிவபெருமான் ஏற்று உலகைக் காப்பாற்றியதாக புராணங்கள் கூறுகின்றன. இந்திரனுக்கு ஏற்பட்ட பிரம்மஹத்தி தோஷம் நீங்குவதற்காக அவர் மதுரையில் சிவபெருமானை தாமரை மலர்களால் வழிபட்டதாகவும், அந்த மலர்கள் தங்கமாக மாறியதாகவும் கதைகள் உள்ளன. இதன் நினைவாகவே கோவிலில் உள்ள பொற்றாமரைக் குளம் சிறப்பு பெற்றதாக நம்பப்படுகிறது.
சுமார் 15 ஏக்கர் பரப்பளவில் அமைந்துள்ள மீனாட்சி அம்மன் கோவில், பல்வேறு காலகட்டங்களில் கட்டப்பட்ட கோபுரங்கள், மண்டபங்கள், சிற்பங்கள் என தனித்துவமான கட்டிடக்கலை சிறப்புகளைக் கொண்டுள்ளது. அம்மன் சன்னதியின் கருவறை விமானம் இந்திரனால் அமைக்கப்பட்டதாக புராணங்களில் கூறப்படுகிறது. இந்திரன் உள்ளிட்ட தேவர்கள், முனிவர்கள் மற்றும் ரிஷிகள் வழிபட்ட தலமாகவும் இக்கோவில் போற்றப்படுகிறது. 64 திருவிளையாடல்கள் நிகழ்ந்ததாக கூறப்படும் மதுரை மண்ணின் ஒவ்வொரு பகுதியுடனும் சிவபெருமானின் திருவிளையாடல் தொடர்பான புராணக் கதைகள் இருப்பதாகவும் செண்பகவல்லி தெரிவித்துள்ளார். மீனாட்சி அம்மன் பச்சை நிறத்துடன் தொடர்புபடுத்தப்பட்டு 'பச்சைப் புடவைக்காரி' என்று பக்தர்களால் அன்புடன் அழைக்கப்படுகிறார். மீனாட்சி அம்மன் மரகத நிறத் திருமேனியுடன் காட்சி அளிப்பதும் கோவிலின் தனிச்சிறப்புகளில் ஒன்றாகும்.