News18 Tamil ·
Religion
ஆயிரம் ஜென்மம் எடுத்தாலும் கிடைக்காத பாக்கியம்... 17 ஆண்டுகளுக்குப் பிறகு மீனாட்சி அம்மன் கோவில் கும்பாபிஷேகம்
வேத ஆகம முறைப்படி 12 ஆண்டுகளுக்கு ஒருமுறை நடைபெற வேண்டிய இந்த நிகழ்வு, தவிர்க்க முடியாத காரணங்களால் தாமதமாகிறது. 12 நாட்கள் யாகசாலை பூஜைகளும் நடைபெறும்.
மதுரை மீனாட்சி அம்மன் கோவிலில் 17 ஆண்டுகளுக்குப் பிறகு கும்பாபிஷேகம் நடைபெற உள்ளது. செப்டம்பர் 17 அன்று நடைபெறவுள்ள இந்த நிகழ்வு, மதுரை மக்களின் வாழ்வில் முக்கியத்துவம் வாய்ந்ததாகக் கருதப்படுகிறது. வேத ஆகம முறைப்படி 12 ஆண்டுகளுக்கு ஒருமுறை கும்பாபிஷேகம் நடத்தப்பட வேண்டும் என்ற நிலையில், தவிர்க்க முடியாத காரணங்களால் 17 ஆண்டுகளுக்குப் பிறகு இந்த நிகழ்வு நடைபெறுகிறது.
சங்கம் வைத்து தமிழ் வளர்த்த மதுரை மாநகரில் அமைந்துள்ள மீனாட்சி அம்மன் கோவில், அதன் வரலாற்றோடும் மக்களின் வாழ்வோடும் பின்னிப் பிணைந்துள்ளது. வர்ணையாளர் மீனாட்சி ராமச்சந்திரன் கருத்துப்படி, திருவாரூரை பிறக்க முக்தி, சிதம்பரத்தை தரிசிக்க முக்தி, திருவண்ணாமலையை நினைக்க முக்தி, காசியில் இறக்க முக்தி என்று சொல்லப்படுவது உண்டு. ஆனால் மதுரையில் மண்ணில் கால் வைத்தாலே முக்தி கிடைக்கும் என்ற பெருமை இந்த மாநகருக்கு இருப்பதாக அவர் குறிப்பிடுகிறார். இந்த கும்பாபிஷேகம் கோவிலின் தனித்துவமான கோபுர அமைப்பிற்கும், பல நூற்றாண்டுகளைக் கடந்து நிற்கும் வரலாற்றிற்கும் கூடுதல் சிறப்பை அளிக்கிறது.
பஞ்சபூதங்களான நிலம், நீர், நெருப்பு, காற்று, ஆகாயம் ஆகியவற்றை உள்ளடக்கிய வழிபாட்டு முறைகள் ஒருங்கிணையும் முக்கிய நிகழ்வாக கும்பாபிஷேகம் பார்க்கப்படுகிறது. செப்டம்பர் 17 அன்று முதலில் மீனாட்சி அம்மனுக்கும், தொடர்ந்து சுந்தரேஸ்வரருக்கும் தங்கக் கலசத்தின் மூலம் கும்பாபிஷேகம் நடத்தப்பட உள்ளது.
பின்னர் மூலஸ்தானத்திலும் கும்பாபிஷேக நிகழ்வுகள் நடைபெறும். இந்த கும்பாபிஷேகத்தின் முக்கிய அம்சங்களில் ஒன்றாக 12 நாட்கள் நடைபெறும் யாகசாலை பூஜைகள் அமைகின்றன. மூலஸ்தானத்தில் உள்ள மூலவர்களின் பிம்ப சக்தியை யாகசாலையில் அமைக்கப்படும் கும்பங்களுக்கு கொண்டு வந்து, வேத மந்திரங்கள் முழங்க பூஜைகள் நடத்தப்படும்.