கிராம ரேஷன் கடைகளில் வெங்காயம் வழங்க பொதுமக்கள் வலியுறுத்தல்

குன்னூர்:நீலகிரியில் கிராமபுற ரேஷன் கடைகளிலும் வெங்காயம் மானிய விலையில் வழங்க வலியுறுத்தப்பட்டுள்ளது .

தமிழகத்தில் நகர்புற ரேஷன் கடைகளில் வெங்காயம் விநியோகிக்கப்பட்டு வருகிறது. இந்த உத்தரவின் படி நீலகிரி மாவட்டத்திலும் நகர்புறங்களில் உள்ள ரேஷன் கடைகளில் மட்டுமே வெங்காயம் வழங்கப்பட்டு வருகிறது.

நுகர்வோர் பாதுகாப்பு சங்க தலைவர் மனோகரன் கூறுகையில், நீலகிரி மாவட்டத்தில் வெங்காயம் உள்ளிட்ட காய்கறிகள் விளைவதில்லை; இவை அனைத்தும் சமவெளி பகுதிகளில் இருந்து கொண்டு வரப்படுகின்றன. இதனால் வெளிச்சந்தைகளில் இவற்றின் விலை உயரும்போது, உள்ளூர் விவசாயிகள் மற்றும் கூலி தொழிலாளர்கள் பொருளாதார நெருக்கடிக்கு ஆளாகின்றனர். எனவே, மலை மாவட்டமான நீலகிரிக்கு சிறப்பு கவனம் செலுத்தி, நகர்புறங்களுக்கு இணையாக கிராமப்புறங்களில் உள்ள அனைத்து ரேஷன் கடைகளிலும் மானிய விலையில் வெங்காயம் கிடைக்க மாவட்ட நிர்வாகம், மாநில அரசு உடனடி நடவடிக்கை எடுக்க வேண்டும், என்றார்.