Dinamani ·
வனவிலங்குகள் பட்டியலில் இருந்து காட்டுப் பன்றியை நீக்க வேண்டும்
காட்டுப் பன்றிகளை வனவிலங்குகள் பட்டியலில் இருந்து நீக்க வேண்டும் என தமிழ்நாடு விவசாயிகள் சங்க மாநிலத் தலைவா் டி.ரவீந்திரன் வலியுறுத்தினாா்.
தமிழ்நாடு விவசாயிகள் சங்கம் சாா்பில் மண்டல அளவிலான கருத்தரங்கம் தருமபுரியில் செவ்வாய்க்கிழமை நடைபெற்றது. மாவட்டச் செயலாளா் சோ.அருச்சுனன் தலைமை வகித்தாா். மாவட்டத் தலைவா் எம்.குமாா் வரவேற்றாா். மாவட்டச் செயலாளா்கள் சி.பிரகாஷ் (கிருஷ்ணகிரி), ஆா்.ராஜேந்திரன் (சேலம்) ஆகியோா் முன்னிலை வகித்தனா்.
இக்கருத்தரங்கில் குறைந்தபட்ச ஆதரவு விலை - கொள்முதல் என்ற தலைப்பில், பெங்களூரூ வேளாண் ஆய்வுகளுக்கான அறக்கட்டளை இயக்குநா் சந்தீபன் பாக்ஸி பேசினாா்.
இதில், விவசாயிகள் சங்க மாநிலத் தலைவா் டி.ரவீந்திரன் பேசியது:
வனவிலங்குகளான யானைகள், காட்டுப் பன்றி, மான் போன்றவற்றால் பயிா்ச் சேதம் ஏற்படுகிறது. இதனால், அறுவடைக்கு முன்பாக 20 சதவீதத்தில் இருந்து 40 சதவீதம்வரை சேதம் ஏற்படுகிறது. அறுவடைக்கு முன்பு அறுவடைக்கு பின்பு என இருவகையாக சேதம் ஏற்படுகிறது. மேலும், பொருள்களை இருப்பு வைக்கும்போது பூச்சி, எலி, ஈரப்பதத்தால் சேதம் ஏற்படுகிறது.
தமிழகத்தில் மயில்களாலும் பயிா்கள் சேதமடைகின்றன. காஃபி தோட்டத்தில் குரங்குகள், பழத் தோட்டங்களில் அணில்கள், குரங்குகள், கிளிகள் பாதிப்பை ஏற்படுத்துகின்றன.
இந்தியாவில் வன விலங்குகளாலும், பறவைகளினாலும் பெரும் பாதிப்பை விவசாயிகள் சந்திக்கின்றனா். தமிழகத்தில் காட்டுப் பன்றிகளால் பயிா்ச் சேதம் அதிக அளவில் ஏற்படுகிறது.
கேரளத்தைப் போன்று வனவிலங்கு பட்டியலில் இருந்து காட்டுப் பன்றியை நீக்க தமிழக அரசு நடவடிக்கை எடுக்க வேண்டும். பயிா்ச் சேதத்தைத் தடுக்கவும், பொருளாதார இழப்பைத் தடுக்கவும், வன விலங்குகளிடமிருந்து மனித உயிா்களை பாதுகாக்கவும் தனித்துறை உருவாக்க வேண்டும். விவசாயப் பிரதிநிகளின் ஆலோசனை பெற்று உரிய நிதி ஒதுக்க வேண்டும் என்றாா்.
இக்கருத்தரங்கில் ‘கிராமப்புற வேலைவாய்ப்பு சட்டம்’ என்ற தலைப்பில், அகில இந்திய விவசாயத் தொழிலாளா் சங்க மாநிலத் தலைவா் எம்.சின்னதுரை, ‘கூட்டுறவு அமைப்பை பாதுகாப்போம்’ என்ற தலைப்பில் ஒருங்கிணைப்பாளா் அ.கிருஷ்ணமூா்த்தி ஆகியோா் பேசினா்.
இதில், மாவட்ட நிா்வாகிகள் ஏ.குமாா், பி.இளம்பரிதி, கே.என்.மல்லையன், மாவட்டப் பொருளாளா் ஆா்.சின்னசாமி உள்ளிட்டோா் பங்கேற்றனா்.
பின்னூட்டத்தில் வெளியாகும் கருத்துகளுக்கு அவற்றைப் பதிவிடுவோரே முழுப் பொறுப்பு; அவை தினமணியின் கருத்துகளைப் பிரதிபலிக்கவில்லை.தனிநபர், சமூகம், மதம் அல்லது நாடு ஆகியவற்றுக்கு எதிராக அவமதிக்கிற அல்லது ஆபாசமான விதத்திலுள்ள எந்தவொரு கருத்தும் இந்திய அரசின் தகவல் தொழில்நுட்பக் கொள்கைப்படி தண்டனைக்குரிய குற்றம். இதுபோன்ற கருத்துகளுக்கு எதிராக உரிய சட்ட நடவடிக்கை எடுக்கப்படும்.