News18 Tamil ·
தொழில்முனைவோருக்கு சூப்பர் வாய்ப்பு... தமிழக சுற்றுலா விருதுக்கு விண்ணப்பிக்கலாம்
தமிழக அரசின் சுற்றுலாத் துறையின் சார்பில் நடப்பாண்டுக்கான தமிழ்நாடு சுற்றுலா விருதுகளுக்கு ராமநாதபுரம் மாவட்டத்தில் உள்ள தொழில்முனைவோர் மற்றும் வழிகாட்டிகள் விண்ணப்பிக்கலாம்.
தமிழக அரசின் சுற்றுலாத் துறையின் சார்பில் நடப்பாண்டுக்கான தமிழ்நாடு சுற்றுலா விருதுகளுக்கு ராமநாதபுரம் மாவட்டத்தில் உள்ள தொழில்முனைவோர் மற்றும் வழிகாட்டிகள் விண்ணப்பிக்கலாம் என மாவட்ட ஆட்சியர் சிவகுரு பிரபாகரன் தெரிவித்துள்ளார்.
தமிழகத்தில் சுற்றுலாத் துறையை மேம்படுத்துவதற்காக பல்வேறு நடவடிக்கைகள் மேற்கொள்ளப்பட்டு வருகின்றன. இதன் ஒரு பகுதியாக, சுற்றுலா ஏற்பாட்டாளர்கள், சுற்றுலா தொழில்முனைவோர் மற்றும் தங்கும் விடுதி முகவர்களை ஊக்குவிக்கும் நோக்கில், கடந்த 2022 ஆம் ஆண்டு முதல் தமிழ்நாடு சுற்றுலா விருதுகள் வழங்கப்பட்டு வருகின்றன.
நடப்பாண்டில் சிறந்த உள்நாட்டு மற்றும் வெளிநாட்டு சுற்றுலா ஏற்பாட்டாளர், சிறந்த பயணப் பங்குதாரர், சிறந்த தங்குமிடம், சிறந்த உணவகம், சுற்றுலா வளர்ச்சிக் கழகத்தின் சிறந்த செயல்பாட்டாளர், சுற்றுலாவை சிறப்பாக ஊக்குவிக்கும் மாவட்டம், தூய்மையான சுற்றுலாத்தலம் உள்ளிட்ட 13 பிரிவுகளில் மொத்தம் 31 விருதுகள் வழங்கப்பட உள்ளன.
ராமநாதபுரம் மாவட்டத்தில் உள்ள மேற்கண்ட பிரிவுகளில் தொழில்முனைவோர் மற்றும் வழிகாட்டிகள் இந்த விருதுகளுக்கு விண்ணப்பிக்கலாம். விண்ணப்பிக்க விரும்புவோர் www.tntourismawards.com என்ற இணையதளப் பக்கத்திற்குச் சென்று, அங்குள்ள விண்ணப்பப் படிவத்தைப் பூர்த்தி செய்து செப்டம்பர் 30 ஆம் தேதிக்குள் சமர்ப்பிக்க வேண்டும். விண்ணப்பம் தொடர்பான ஏதேனும் சந்தேகங்கள் இருப்பின், 04573 - 221371 மற்றும் 9176995871 ஆகிய ராமநாதபுரம் மாவட்ட சுற்றுலா அலுவலர் எண்களைத் தொடர்பு கொண்டு தெளிவுபடுத்திக் கொள்ளலாம் என மாவட்ட ஆட்சியர் சிவகுரு பிரபாகரன் தெரிவித்துள்ளார்.