News18 Tamil ·
சர்வதேச கழுகு விழிப்புணர்வு தினம்: முக்கியத்துவம் பெறும் முதுமலை வனப்பகுதி..!
முதுமலை புலிகள் காப்பகம் தென்னிந்தியாவில் பாறு கழுகுகளின் முக்கிய புகலிடமாக உள்ளது, அங்கு 4 வகையான அரிய கழுகுகள் பாதுகாக்கப்படுகின்றன.
சர்வதேச கழுகு விழிப்புணர்வு தினம் ஒவ்வொரு ஆண்டும் செப்டம்பர் மாதத்தின் முதல் சனிக்கிழமையன்று உலகளவில் அனுசரிக்கப்படுகிறது. இந்த ஆண்டு செப்டம்பர் 5இல் இந்நாள் கடைப்பிடிக்கப்பட்டது.
இயற்கையின் துப்புரவாளர்களாகவும், 'காடுகளின் காவலன்' என்றும் அழைக்கப்படும் பாறு கழுகுகளின் வளங்காப்பு மற்றும் பாதுகாப்பு குறித்த விழிப்புணர்வை பொதுமக்களிடம் ஏற்படுத்துவதே இத்தினத்தின் முக்கிய நோக்கமாகும்.
இந்தியாவில் 2004ஆம் ஆண்டிற்குள் சுமார் 97 சதவீத கழுகுகள் அழிந்துவிட்டதாகக் கண்டறியப்பட்டது. இதைத் தொடர்ந்து, இந்திய அரசு டைக்ளோஃபெனாக் மருந்துக்குத் தடை விதித்ததுடன், பாம்பே இயற்கை வரலாற்று சங்கம் (BNHS) போன்ற அமைப்புகளுடன் இணைந்து கழுகுப் பாதுகாப்பு மற்றும் இனப்பெருக்க மையங்களை அமைத்து கழுகுகளைப் பாதுகாத்து வருகிறது.
இதையும் படிங்க: மெரினாவின் வாசலில் நிற்கும் நேப்பியர் பாலம்... ஒரு கவர்னர் பெயர் பாலத்திற்கு வந்த கதை..!
நீலகிரி மாவட்டம் முதுமலை புலிகள் காப்பகம் (MTR) மற்றும் அதனைச் சுற்றியுள்ள சீகூர் பீடபூமி பகுதிகள், தென்னிந்தியாவில் எஞ்சியிருக்கும் பாறு கழுகுகளின் மிக முக்கியமான கடைசிப் புகலிடமாக விளங்குகின்றன. தமிழ்நாடு, கர்நாடகா மற்றும் கேரளா ஆகிய மூன்று மாநிலங்களின் எல்லையில் அமைந்துள்ள இக்காப்பகம், இந்த அரிய வகை துப்புரவாளர் பறவைகளின் இனப்பெருக்கத்திற்கும் வாழ்வாதாரத்திற்கும் உகந்த இயற்கைச் சூழலைக் கொண்டுள்ளது.
முதுமலையில் வெண்முதுகு பாறு கழுகு, நீண்ட அலகு பாறு கழுகு / கருங்கழுத்துப் பாறு, செந்தலைப் பாறு கழுகு / ராஜாளி கழுகு, மஞ்சள்முகப் பாறு கழுகு போன்ற 4 வகை அரிய கழுகுகள் வாழ்கின்றன. நீலகிரி உயிர்க்கோளக் காப்பகத்தில் மொத்தம் உள்ள 75 சுறுசுறுப்பான பாறு கழுகு கூடுகளில், 54 கூடுகள் முதுமலையில் மட்டுமே கண்டறியப்பட்டுள்ளன.
அழிவின் விளிம்பில் உள்ள பாறு கழுகுகளைப் பாதுகாப்பது அனைவரது கடமையாகவும் கருதப்படுகிறது. சர்வதேச கழுகு விழிப்புணர்வு தினம், இந்த அரிய பறவைகளின் பாதுகாப்பு குறித்த விழிப்புணர்வை ஏற்படுத்தி, அவற்றின் வாழ்வாதாரத்தைப் பாதுகாக்க உதவும்.