பாக்., மாஜி பிரதமர் இம்ரான் கானின் முன்னாள் மனைவி ரகசிய திருமணம்

லண்டன்: பாகிஸ்தான் முன்னாள் பிரதமர் இம்ரான் கானின் முன்னாள் மனைவியும், பிரிட்டன் திரைப்பட தயாரிப்பாளருமான ஜெமிமா கோல்டுஸ்மித், 52, பெரும் கோடீஸ்வர பைனான்சியரான கேமரன் ஓ ரெய்லியை ரகசிய திருமணம் செய்து கொண்டார்.

நம் அண்டை நாடான பாகிஸ்தானின் முன்னாள் பிரதமரும், அந்நாட்டின் பிரபல கிரிக்கெட் வீரருமான இம்ரான் கான், பிரிட்டனின் திரைக்கதை எழுத்தாளரும், தயாரிப்பாளருமான ஜெமிமா கோல்டுஸ்மித்தை, 1995ல் திருமணம் செய்தார்.

இவர்கள் இருவரிடையே ஏற்பட்ட கருத்து வேறுபாட்டால், 2004ல் விவாகரத்து பெற்றனர். இத்தம்பதிக்கு சுலைமான் மற்றும் காசிம் என்ற இரு மகன்கள் உள்ளனர்.

விவாகரத்துக்கு பின் பத்திரிகை துறையில் கவனம் செலுத்திய ஜெமிமா, சொந்த திரைப்பட தயாரிப்பு நிறுவனத்தை தொடங்கி பல ஆவணப்படங்கள், திரைப்படங்களை தயாரித்துள்ளார்.

இந்நிலையில், அயர்லாந்து வம்சாவளியைச் சேர்ந்தவரும், ஆஸ்திரேலியாவின் பிரபல வணிகரும், தனியார் பங்கு முதலீட்டு நிர்வாகியுமான கேமரன் ஓ ரெய்லியை, 62, கடந்த வாரம் இறுதியில் திருமணம் செய்தார்.

இத்திருமணம் ரகசியமாக நடந்திருந்தாலும், ஜெமிமாவின் சகோதரர் பென் கோல்டுஸ்மித்தின் மனைவி ஜெமிமா ஜோன்ஸ், தன் சமூக வலைதள பக்கத்தில் புகைப்படங்களை பகிர்ந்து வாழ்த்து தெரிவித்ததையடுத்து இத்தகவல் வெளிவந்துள்ளது. விவாகரத்து பெற்று, 21 ஆண்டுகளுக்கு பின் ஜெமிமா இரண்டாவது திருமணம் செய்துள்ளார்.