கடன் பாக்கிய கேட்ட விடுதி உரிமையாளரை கடத்தி நகை, பணத்தை பறித்த பெண் உட்பட 4 பேருக்கு வலை

புதுச்சேரி: கடனை கேட்ட விடுதி உரிமையாளரை கடத்தி சென்று நகை, பணம் பறித்த பெண் உட்பட 4 பேரை போலீசார் தேடிவருகின்றனர்.

புதுச்சேரி கருவடிக்குப்பத்தை சேர்ந்தவர் மனோகர், 35; இவர் மூலக்குளத்தில் லீஸ் மூலம் கெஸ்ட் ஹவுஸ் நடத்தி வருகிறார். இவரிடம் உப்பளத்தை சேர்ந்த பாண்டியன் மனைவி ரேவதி என்பவர் 50 ஆயிரம் ரூபாய் பணம் கடனாக வாங்கியிருந்தார். அதிலிருந்து 30 ஆயிரம் ரூபாயை ரேவதி கொடுத்துள்ளார்.

இந்நிலையில், கடன் பாக்கி 20 ஆயிரம் ரூபாயை அவரிடம் மனோகர் கேட்டார். மேட்டுப்பாளையம் கனரக வாகனங்கள் நிறுத்தும் இடத்திற்கு வந்து பணத்தை வாங்கி கொள்ளுங்கள் என ரேவதி கூறினார். கடந்த 4ம் தேதி, அங்கு சென்று காத்திருந்த மனோகரை, டாட்டா ஏ.சி., வாகனத்தை ஓட்டி வந்தவர் அவரை கடத்தி சென்று திண்டிவனம் சாலை டோல்கேட் அருகே ஆள் நடமாட்டம் இல்லாத இடத்தில் நிறுத்தினார்.

இரு சக்கர வாகனத்தில் வந்த இரண்டு பேரும் மற்றும் டாட்டா ஏ.சி., ஓட்டி வந்தவரும் சேர்ந்து, மனோகர் வைத்திருந்த மொபைல், ரொக்க பணம் 2 ஆயிரம் ரூபாய், அவர் அணிந்திருந்த செயின், மோதிரத்தை பறித்துக்கொண்டு அவரை இரும்பு பைப்பால் தாக்கி, கொலை மிரட்டல் விடுத்து அங்கிருந்த தப்பி சென்றனர்.

இதுகுறித்து, மனோகர் கொடுத்த புகாரின் பேரில், டி.நகர் போலீசார் வழக்கு பதிந்து, ரேவதி உட்பட 4 பேரை தேடிவருகின்றனர்.