Dinamalar ·
பஹல்காம் பயங்கரவாத தாக்குதலுக்கு பிரிக்ஸ் மாநாட்டில் கண்டனம்: ஜெய்சங்கர் வரவேற்பு
புதுடில்லி: பஹல்காம் பயங்கரவாத தாக்குதல் சம்பவத்தை பிரிக்ஸ் மாநாட்டில் கண்டிப்பது தொடர்பாக வரலாற்று சிறப்பு மிக்க ஒரு மித்த கருத்து எட்டப்பட்டு உள்ளது என்று மத்திய வெளியுறவுத்துறை அமைச்சர் ஜெய்சங்கர் கூறினார்.
இது தொடர்பாக நிருபர்களிடம் அவர் கூறியதாவது: பிரிக்ஸ் மாநாட்டின் டில்லி பிரகடனத்தின் வாயிலாக எல்லை தாண்டிய பயங்கரவாதத்திற்கு எதிராக ஒரு திட்டவட்டமான நிலைப்பாட்டை எடுத்துள்ளது. பஹல்காம் பயங்கரவாத தாக்குதலை வெளிப்படையாக கண்டித்துள்ளது. எந்தவொரு பயங்கரவாத செயலும் குற்றமாகும் என்பதில் பிரிக்ஸ் அமைப்பு மிகவும் தெளிவாக இருந்தது. 2025 ஏப்ரல் 22 அன்று நடந்த பஹல்காம் பயங்கரவாத தாக்குதல் சம்பவம் ஏற்றுக் கொள்ள முடியாதது என்பதை வெளிப்படையாக பிரிக்ஸ் அமைப்பு அங்கீகரித்தது.எல்லை தாண்டிய பயங்கரவாதம் உட்பட பயங்கரவாதத்தின் அனைத்து வடிவங்களையும் வெளிப்பாடுகளையும் கண்டித்ததோடு , அதில் இரட்டை நிலைப்பாட்டையும் நிராகரித்தனர்.
பிரதமர் மோடியின் ராஜதந்திரம் மற்றும் வளர்ச்சி குறித்த செய்தி உலகம் எங்கும் பெரும் தாக்கத்தை ஏற்படுத்தியது. அந்த செய்திக்கு கிடைத்த வரவேற்பைத் தான் பிரிக்ஸ் மாநாட்டிற்கு உலக தலைவர்கள் வந்த போது நாம் கண்டோம். இது நடக்காது என்று பலர் சொன்னார்கள். ஆனால், அது நடந்தது.பிரதமர் மோடியின் கீழ் நடந்தது. இவ்வாறு ஜெய்சங்கர் கூறினார்.
