Dinamani ·
பாரம்பரிய விளையாட்டு பல்லாங்குழி
கணிதம், உத்திகள் சார்ந்த ஒரு பலகை விளையாட்டு, பல்லாங்குழி. இது தென்னிந்தியாவின் பழைமையான விளையாட்டுகளில் ஒன்றாகும். குழிகளைக் கொண்ட தனித்துவமான மரப் பலகைக்காகப் பிரபலமாக அறியப்படும் விளையாட்டு.
விரைவான மனக்கணக்கீடு தேவைப்படும் ஒரு 'விதைத்தல், அறுவடை செய்தல்' சார்ந்த விளையாட்டான இது, தமிழ்நாட்டில் பல்லாங்குழி, கர்நாடகாவில் அலி குலி மனே, ஆந்திரப் பிரதேசம் / தெலுங்கானாவில் வாமன குண்டலு, கேரளத்தில் குழிப்பறா என்ற பெயர்களில் அழைக்கப்படுகிறது.
இரண்டு இணையான வரிசைகளைக் கொண்ட ஒரு விளையாட்டுப் பலகையில் (பல்லாங்குழிப் பலகை) ஒவ்வொரு வரிசையிலும் 7 குழிகள் வீதம் மொத்தம் 14 சிறிய குழிகள் இருக்கும். சில நவீன அல்லது வட்டார வடிவங்களில் 12 குழிகள் கொண்ட பலகைகளும் பயன்படுத்தப்படுகின்றன.
