Vikatan ·
“விருப்பமிருந்தால் வழி உண்டு” சேலம், கோயம்புத்தூர் குடிநீர், பாசன வசதி குறித்து விவாதம்
வறட்சியால் அவதிப்படும் சேலத்துக்கு வாய்ப்பு மறுக்கப்படுவது அநியாயம். “விருப்பமிருந்தால் வழி உண்டு” என்ற அடிப்படையில் அரசு விருப்பத்துடன் செயல்பட்டால் சேலத்துக்கும் பாசனம் சாத்தியமே என்றார் எல்லப்பா செட்டியார்.
காவிரி – மேட்டூர் திட்டம் தமிழக அரசியல் வரலாற்றில் மிக முக்கிய இடத்தைப் பெற்றது. அணை கட்டும் பணி முன்னேறிய அந்தக் காலத்தில், திட்டத்தின் பயன்கள் எந்தெந்த பகுதிகளுக்கு வழங்கப்படும் என்ற கேள்வி பல்வேறு மாவட்டங்களிலிருந்து எழுந்தது. குறிப்பாக, சேலம் நகரத்திற்கும் சேலம், கோயம்புத்தூர் மாவட்டங்களுக்கும் குடிநீர் மற்றும் பாசன வசதி கிடைக்க வேண்டுமென்ற கோரிக்கை சட்டமன்றத்தில் பல முறை முன்வைக்கப்பட்டது.
சேலம் நகர மக்கள் நீர் பஞ்சத்தால் அவதிப்பட்ட நிலையில், அங்குள்ள மாநகராட்சி கவுன்சில், மேட்டூர் அணையிலிருந்து குடிநீர் வழங்குமாறு அரசாங்கத்தை அணுகியது. இது குறித்து சட்டமன்றத்தில் கேள்வி எழுப்பியபோது, அமைச்சர்கள் அளித்த பதில்களில் “நிதி அம்சம் பரிசீலனையில் உள்ளது” என்ற வாக்கியமே தொடர்ந்து இடம்பெற்றது. நிலப்பரப்புகள் குறித்த சிரமம் இல்லை என்றாலும், நிதி பற்றிய தடையை காரணம் காட்டி அரசு எந்த உறுதியையும் அளிக்க மறுத்தது.
