Puthiya Thalaimurai ·
ஜனநாயகன் VS கருப்பு : வசூலில் முந்தியது யார்?
2026-ம் ஆண்டு தமிழ் சினிமாவின் மிகப்பெரிய ஹிட் படங்களில் முக்கியமான இரு படங்கள் விஐய் நடித்து வெளியான `ஜனநாயகன்' மற்றொன்று சூர்யாவின் `கருப்பு'. பாக்ஸ் ஆபிஸ் பொறுத்தவரை மிகப்பெரிய வசூல் கொடுக்கும் நடிகர் விஜய். ஆனால் இந்த முறை `ஜனநாயகன்' படம் இணையத்தில் கசிந்தது படத்தின் வசூலை பாதித்ததாக சொல்லப்பட்டது. எனவே சூர்யாவின் `கருப்பு' படம் வசூலில் முந்திவிடும் எனவும் சொல்லப்பட்டது. இப்போது இந்த இரண்டு படங்களும் திரையரங்க ஓட்டத்தை நிறைவு செய்த நிலையில், வசூலின் உண்மை நிலை என்ன? வசூலில் முந்தியது `ஜனநாயகனா'? கருப்பா? எனவும் விசாரித்தோம்.
ஆர்.ஜே. பாலாஜி இயக்கத்தில் சூர்யா, திரிஷா உள்ளிட்டோர் நடித்த ‘கருப்பு’, வெளியான சில நாட்களிலேயே மிகப்பெரிய வசூலை குவித்தது. எட்டு நாட்களில் உலகளவில் ₹200 கோடியை கடந்ததாக சொல்லப்பட்டது. இதன் மூலம் சூர்யாவின் அதிக வசூல் செய்த படமாகவும் ‘கருப்பு’ உருவெடுத்தது. பின்னர் 15 நாட்களில் உலகளவில் ₹300 கோடியை கடந்ததாக அறிவிக்கப்பட்டது. படத்தின் இறுதி உலகளாவிய வசூல் சுமார் 314 கோடி ரூபாய் Gross என்ற தகவலும் வெளியாகியுள்ளது.
ஹெச்.வினோத் இயக்கத்தில் விஜய் நடித்த ‘ஜனநாயகன்’, வெளியான நான்கு நாட்களிலேயே உலகளவில் ₹200 கோடியை கடந்தது. படத்தின் வசூல் தொடர்ந்து அதிகரித்த நிலையில், 18-வது நாளில் உலகளவில் சுமார் ₹318 கோடி வசூல் செய்ததாக சொல்லப்படுகிறது. இதன் மூலம் 2026-ம் ஆண்டின் அதிக வசூல் செய்த தமிழ் படமாக ‘கருப்பு’வை முந்தியுள்ளது என தகவல்.
