Nakkheeran · 10 Sept, 19:21

Politics

இடைத்தேர்தலில் களம் காண்கிறாரா மம்தா?; கட்சி தொண்டர்கள் எதிர்பார்ப்பு

மேற்குவங்கத்தில் வருகின்ற அக்டோபர் 6 அன்று காலியாக உள்ள 2 சட்டமன்றத் தொகுதிகளுக்கு இடைத்தேர்தல் அறிவிக்கப்பட்டுள்ளது. முர்ஷிதாபாத் மாவட்டத்தில் உள்ள ரெஜினகர் மற்றும் நந்திகிராம் ஆகிய இரு தொகுதிகளுக்கும் இடைத்தேர்தல் நடைபெற உள்ளது. இதில், ரெஜினகர் தொகுதியில் வெற்றி பெற்ற சட்டமன்ற உறுப்பினர் ஹிமாயூன் கபிர் பதவி விலகினார். அதே போல, நந்திகிராம் தொகுதியில் சுவேந்து அதிகாரி ராஜினாமா செய்தார். இதனால், இரண்டு தொகுதிகளும் காலியாக உள்ளன.

கடந்த ஏப்ரல் மாதம் நடைபெற்ற, சட்டமன்ற பொதுத்தேர்தலில் திரிணாமுல் காங்கிரஸ் கட்சியின் தலைவரும், முன்னாள் முதல்வருமான மம்தா பானர்ஜி நந்திகிராம் தொகுதியில் போட்டியிட்டு பாஜக வேட்பாளரும், தற்போதைய முதல்வருமான சுவேந்து அதிகாரியிடம் தோல்வியடைந்தார். இந்நிலையில், தற்போது 2 தொகுதிகளுக்கு இடைத்தேர்தல் அறிவிக்கப்பட்டுள்ளதால், நந்திகிராம் தொகுதியில் மம்தா பானர்ஜி போட்டியிடுவாரா? என்ற கேள்வி எழுந்துள்ளது.

இதனிடையே, மேற்குவங்கத்தில் பாஜகவின் வளர்ச்சி மற்றும் திரிணாமுல் காங்கிரஸ் கட்சியில் உட்கட்சி பூசல் நிலவும் இந்த சூழலில், மம்தா தேர்தலில் போட்டியிட வேண்டியது மிகவும் அவசியம் எனக் கட்சியின் தொண்டர்கள் விரும்புகின்றனர். அவர் இந்த தேர்தலில் வெற்றி பெற்று எதிர்க்கட்சி தலைவராகப் பொறுப்பேற்றால் சட்டமன்றத்தில் மக்களின் பிரச்சனைகளை எடுத்துக்கூற முடியும் என்றும், அதே நேரத்தில் கட்சியில் உள்ள உட்கட்சி பூசல்களையும் சரி செய்ய முடியும் என்றும் தொண்டர்கள் வலியுறுத்தி வருகின்றனர்.

இதனிடையே, நந்திகிராம் தொகுதியில் போட்டியிட்டால் மம்தா வெற்றி பெற மிக அதிக வாய்ப்பிருப்பதாக அரசியல் விமர்சகர்கள் கூறுகின்றனர். அதே போல, ரெஜினகர் தொகுதியும் மம்தாவிற்கு வெற்றி வாய்ப்பை உறுதி செய்யும் தொகுதியாகவே கருதப்படுகிறது.

இருப்பினும், மம்தா தேர்தலில் போட்டியிடுவாரா? என்பது குறித்து எந்தவித அதிகாரப்பூர்வ தகவலும் வெளியாகவில்லை. அதே நேரத்தில், கட்சி நிர்வாகிகள் மற்றும் தொண்டர்கள் அவரை தேர்தலில் போட்டியிடத் தொடர்ந்து வலியுறுத்தி வருகின்றனர். இந்த சூழலில், மம்தா என்ன முடிவெடுப்பார்? என்பது குறித்தான தகவல் விரைவில் வெளியாகும் என்று தெரிவிக்கப்பட்டுள்ளது.