News18 Tamil ·
Lifestyle and human interest
பிரதமர் மோடி - ஈரான் அதிபர் சந்திப்பு: இருதரப்பு உறவை மேலும் வலுப்படுத்த ஈரான் ஆர்வம்!
அமெரிக்காவின் கட்டுப்பாடுகளுக்கு மத்தியிலும், இந்தியாவும் ஈரானும் தங்கள் இருதரப்பு மற்றும் பிராந்திய வர்த்தக உறவுகளைத் தொடர்ந்து வலுப்படுத்தி வருகின்றன.
இந்தியாவிற்கும் ஈரானுக்கும் இடையிலான இருதரப்பு உறவுகள் மிகவும் வலுவாகவும் வரலாற்றுச் சிறப்புமிக்கதாகவும் இருப்பதாக ஈரான் அரசு பாராட்டு தெரிவித்துள்ளது.
ஷாங்காய் ஒத்துழைப்பு அமைப்பின் (SCO) மாநாட்டின் போது, பிரதமர் நரேந்திர மோடி மற்றும் ஈரானிய அதிபர் மசூத் பெஷேஷ்கியான் (Masoud Pezeshkian) இடையிலான சந்திப்பு நடைபெற்ற நிலையில், இந்த முக்கியக் கருத்துகளை ஈரான் வெளியுறவு அமைச்சகம் தெரிவித்துள்ளது.
ஈரான் வெளியுறவு அமைச்சகத்தின் செய்தித் தொடர்பாளர் இஸ்மாயில் பாகாய் (Esmaeil Baghaei) இதுகுறித்து கூறுகையில், இந்தியாவும் ஈரானும் நீண்டகால வரலாற்று மற்றும் நாகரிகப் பிணைப்பைக் கொண்டுள்ளன என்றும், இந்தியாவுடன் வர்த்தகம் மற்றும் பொருளாதாரம் உள்ளிட்ட பல்வேறு துறைகளில் சிறப்பான உறவை ஈரான் பேணி வருவதாகவும் குறிப்பிட்டார். மேலும், இந்தியா SCO மற்றும் பிரிக்ஸ் (BRICS) ஆகிய சர்வதேச அமைப்புகளில் முக்கிய உறுப்பினராக உள்ளது என்றும் அவர் சுட்டிக்காட்டினார்.
டெல்லியில் நடைபெறவுள்ள 18-வது பிரிக்ஸ் உச்சிமாநாட்டை, இரு நாடுகளுக்கும் இடையிலான பரஸ்பர நலன் சார்ந்த விஷயங்களை மேலும் முன்னெடுத்துச் செல்வதற்கான ஒரு நல்ல வாய்ப்பாக ஈரான் பார்க்கிறது. குறிப்பாக, இரு நாடுகளின் பொருளாதாரப் வளர்ச்சிக்கும் வர்த்தகப் போக்குவரத்துக்கும் மிக முக்கியமான தூணாக விளங்கும் "சபாகார் துறைமுகம்" (Chabahar Port) திட்டம் குறித்து இந்த மாநாட்டில் விரிவாக ஆலோசிக்கப்படும் என்று எதிர்பார்க்கப்படுகிறது.
அதேவேளையில், இந்தியா-ஈரான் இடையிலான இந்த நெருக்கமான உறவை அமெரிக்கா உன்னிப்பாகக் கவனித்து வருகிறது. இது குறித்து கருத்து தெரிவித்துள்ள அமெரிக்க வெளியுறவுச் செயலர் மார்கோ ரூபியோ, ஈரான் மீதான அமெரிக்கப் பொருளாதாரத் தடைகளை மீறி எந்தவொரு நாடும் ஈரானுக்கு வர்த்தக ரீதியாக உதவக் கூடாது என்று எச்சரித்துள்ளார்.
ஈரான் ஈட்டும் நிதியானது பயங்கரவாத நடவடிக்கைகளுக்கோ அல்லது அணுஆயுதத் தயாரிப்பிற்கோ பயன்படுத்தப்படக் கூடாது என்பதில் அமெரிக்கா உறுதியாக உள்ளது. இருப்பினும், அமெரிக்காவின் இந்தக் கட்டுப்பாடுகளுக்கு மத்தியிலும், இந்தியாவும் ஈரானும் தங்கள் இருதரப்பு மற்றும் பிராந்திய வர்த்தக உறவுகளைத் தொடர்ந்து வலுப்படுத்தி வருகின்றன.