இபிஎஸ் தோட்டத்திலேயே கைவரிசை காட்டிய திருடர்கள்- தனிப்படை அமைப்பு

சேலம் மாவட்டம் எடப்பாடி அருகே உள்ள சிலுவம்பாளையம் பகுதியில் அதிமுக பொதுச்செயலாளர் எடப்பாடி பழனிசாமிக்குச் சொந்தமான விவசாயத் தோட்டம் அமைந்துள்ளது. இந்தத் தோட்டத்திற்குள் நள்ளிரவில் புகுந்த மர்ம நபர்கள் சிலர், அங்கிருந்த கிணற்று மின்மோட்டார்களின் காப்பர் வயர்களைத் துண்டித்துக் திருடிச் சென்றுள்ளனர். விவிஐபி அந்தஸ்தில் இருக்கும் ஒரு முக்கியத் தலைவரின் தோட்டத்தில், அதுவும் பலத்த போலீஸ் பாதுகாப்புப் போடப்பட்டுள்ள ஒரு கிராமத்தில் இத்தகைய துணிச்சலான திருட்டுச் சம்பவம் நடந்துள்ளது பெரும் அதிர்ச்சியை ஏற்படுத்தியுள்ளது.

இந்தச் சம்பவம் குறித்துத் தகவல் அறிந்ததும் எடப்பாடி மற்றும் கொங்கணாபுரம் காவல் நிலைய போலீசார் சம்பவ இடத்திற்கு விரைந்து வந்து தீவிர விசாரணையில் இறங்கியுள்ளனர். தோட்டத்தில் வேலை செய்யும் ஊழியர்களிடம் விசாரணை நடத்திய போலீசார், வழக்குப்பதிவு செய்து திருடர்களை தனிப்படை அமைத்து தேடி வருகின்றனர்.

மிகவும் சுவாரசியமான விஷயம் என்னவென்றால், இந்தத் திருட்டுச் சம்பவம் குறித்துச் சட்டசபையில் காவல்துறை மானியக் கோரிக்கை மீதான விவாதம் நடைபெற்ற போது எடப்பாடி பழனிசாமி நேரடியாகப் பகிரங்கமாகப் பேசியுள்ளார். "எனது சொந்த ஊரில் உள்ள எனது சொந்தத் தோட்டத்திலேயே நள்ளிரவில் புகுந்து மின்மோட்டார் வயர்களைத் திருடிச் சென்றுள்ளார்கள். தமிழ்நாட்டில் சட்டம் ஒழுங்கின் நிலைமை இந்த லட்சணத்தில்தான் இருக்கிறது. முன்னாள் முதலமைச்சரின் தோட்டத்திற்கே பாதுகாப்பு இல்லை என்றால், இங்கு வாழும் சாதாரணப் பாமர மக்களின் உடைமைகளுக்கு என்ன பாதுகாப்பு இருக்கிறது?" என்று அரசை நோக்கிக் காரசாரமாகக் கேள்வி எழுப்பி இருந்தார் என்பது குறிப்பிடத்தக்கது.